Қызылордада «Самұрық-Қазына» компаниялары тобы атынан Достық үйі ашылды

Нысанның құрылысын 3,8 млрд теңгеге «Қазатомөнеркәсіп» компаниясы қаржыландырды. Ауданы 3,5 мың шаршы метр болатын үш қабатты ғимаратта 11 этномәдени бірлестік пен қоғамдық ұйым жұмыс істейді.

Сонымен қатар, мұнда 200 орынға арналған концерт залы және қоғамдық, мәдени, ағартушылық бағыттағы іс-шараларды өткізу үшін 50 орынға арналған мәжіліс залы бар.

Соңғы бес жылда Қызылорда облысында Қор тобы жалпы сомасы 6,5 млрд теңге болатын 16 әлеуметтік жобаны жүзеге асырды. Олардың қатарында ерте араласу орталығы, үстел теннисі орталығы, тарихи-мәдени орталық, Оқушылар үйі және «Samruk-Kazyna Trust» пен «ҚазМұнайГаз» АҚ қаржыландырған басқа да нысандар бар.